Gullkistan

Frjálslyndi flokkurinn býður nú fram í Reykjavík í fyrsta sinn einn og óháður. Stefna flokksins snýst um að tryggja velferð og frelsi einstaklingsins. Flokkurinn hefur lengi barist gegn óréttlæti og spillingu í þjóðfélaginu. Frjálslyndi flokkurinn er ekki nefndur til sögunnar í Rannsóknarskýrslu Alþingis, hvorki af styrkjasukki né í því að stunda fyrirgreiðslupólitík. Frjálslyndi flokkurinn getur því þjónað umbjóðendum sínum, almenningi, af heilum hug.

Í mars hélt Frjálslyndi flokkurinn Landsfund. Þar var kosin ný forusta fyrir flokkinn, án nokkura átaka þannig að fjölmiðlar höfðu minnst lítinn áhuga á Landsfundi flokksins. Margir nýir gengu til liðs við flokkinn og meðal annars all margir sem starfað hafa meðal ýmissa grasrótarsamtaka allt frá hruni. Þessir einstaklingar hafa barist fyrir siðbót og réttlæti í þjóðfélaginu og verið í návígi við afleiðingar hrunsins og þekkja því kjör almennings vel.

Nálægð Frjálslynda flokksins við grunnatvinnuvegi þjóðarinnar gefur honum forskot á að skilja mikilvægi þess að afla þjóðinni og framleiða vörur sem nota má til að afla sér þess sem upp á vantar af gæðum landsins. Þessi skilningur átti undir högg að sækja á meðan menn töldu fjármuni verða til í bankakerfinu. Enn skortir skilning á því að gullkista þjóðarinnar er í hafinu og öll þekking og tól eru til staðar til að afla þjóðarbúinu aukinna tekna. Þetta verður Frjálslyndi flokkurinn að hamra á því í dag virðist sjávarútvegurinn vera eina raunhæfa leiðin til aukinna tekna. Sú leið að auka skuldsetningu þjóðarinnar ætti öllum viti bornum mönnum að vera ljóst að er fullreynd.

Bankakreppan og aðkoma Alþjóðagjaldeyrissjóðsins hefur ýtt af stað ferli á sölu fyrirtækja og auðlinda landsmanna í hendur erlendra aðila. Frjálslyndi flokkurinn hefur ætíð varað við slíku. Tveir stærstu bankarnir og HS Orka eru nú í eigu útlendinga. Sterk öfl vilja að Ísland gangi í ESB og þar með mun sjávarútvegur og auðlind hafsins hverfa úr eigu okkar.

Þennan bakgrunn verða menn að hafa í huga þegar rætt er um sveitastjórnakosningar. Suðurnesjamenn seldu HS orku. Í Reykjavík er Orkuveita Reykjavíkur. Alþingi hafði marga mánuði til að koma í veg fyrir söluna á HS Orku. Það sýnir okkur að fjórflokkurinn hefur engann áhuga né getu til að koma í veg fyrir að auðlindir Íslendinga lendi í höndum erlendra aðila. Frjálslyndi flokkurinn hefur aldrei gefið neinn afslátt á andstöðu sinni við sölu auðlindanna og mun ekki gera það heldur núna.

Þrátt fyrir kreppu verðum við að framleiða sem mest. Reykjavíkurborg verður að gefa nýjum sprotafyrirtækjum kost á að komast á skrið. Stuðla verður að því að sú hrávara sem auðlindirnar skapa okkur verði með þekkingariðnaði gerðar að verðmætari vöru fyrir land og þjóð.

Velferðina vill Frjálslyndi flokkurinn verja, þegar kemur að sparnaði þá lítum við fyrst til lúxus eins og, bílastyrki, utanlandsferðir, skoðanakannanir eða yfirbyggingar í stjórnsýslunni sem misst getur sig án þess að velferðin skaðist. Þegar allur lúxus hefur verið afnuminn þá er hugsanlegt að skera niður í velferðinni, en ekki fyrr.

Vantrú almennings á stjórnmálum kemur glögglega fram í aðdragenda sveitastjórnakosninganna í Reykjavík. Að grínframboð Jóns Gnarr fái yfirburðakosningu sínir að trú almennings á fjórflokknum er búið. Sú niðurstaða segir miklu meira um núverandi fjórflokk og almenning en Jón Gnarr. Að álasa honum er að hengja bakara fyrir smið. Frjálslyndi flokkurinn vill ráða bót á þessu. Við viljum að 10% kosningabærra manna í Reykjavík geti farið fram á almennar kosningar um einstök mál. Þetta færir völd til almennings og er ekki vanþörf á því, sökum þess að sérhagsmunastjórnmálamenn hafa sniðgengið almenning allt of lengi. Með auknum völdum almennings mun vakna áhugi á stjórnmálum og þannig mun þjóðin sigla landinu í örugga höfn.

Þitt er valið kæri kjósandi

Jón Gnarr virðist ætla að sigra í kosningunum á laugardaginn. Það er mér ekki á móti skapi að fjórflokkurinn hljóti afhroð, innistæða þeirra er engin vegna slæglegrar frammistöðu fyrir og eftir hrun. Það sem mér sárnar er að sett sé samansemmerki milli mín og fjórflokksins hjá kjósendum. Frjálslyndi flokkurinn var sífelt að vara við skuldunum og benda á aðrar leiðir til tekjuöflunar fyrir þjóðina en sú bankaleið sem valin var. Því miður var ekki hlustað á okkur.

Eftir töluverða endurnýjun í röðum okkar bjóðum við fram í Reykjavík í fyrsta skiptið ein og án samvinnu við önnur stjórnmálaöfl. Í síðustu Alþingiskosningum reyndum við að vera raunsæ og ræddum skuldastöðuna, niðurskurðinn, Icesave og fleira slíkt. Okkur var drekkt í kosningaloforðum fjórflokksins sem forðuðust alla alvarlega umræðu um það sem biði þjóðarinnar. Þess vegna skil ég vel hugsun Jóns Gnarr með framboði sínu, ef fólk keypti slíkt rugl á sínum tíma má sjálfsagt selja því hvað sem er. Gott bros og gleði er sjálfsagt mun betra en innantóm kosningloforð fjórflokksins.

Aftur bjóðum við Frjálslyndir okkur fram og aftur bjóðum við upp á umræðu um þær hættur sem þjóðin stendur frammi fyrir. Við teljum að gagnrýnislaus eftirfylgni við stefnu Alþjóðagjaldeyrissjóðsins muni valda miklum niðurskurði á velferð, atvinnuleysi, landflótta og sölu auðlinda til einkaaðila. Við teljum að þessi skilningur á orsökum fátæktar í Reykjavík sé nauðsynlegur í borgarráði. Það er til lítils að safna brauðmolum handa hungruðum meðan AGS fær að leika lausum hala og skapar dýpri kreppu í landinu. Nær væri að koma böndum á hugmyndafræði sjóðsins og fylgisveina hans hér á landi.

Þess vegna bíð ég mig fram kæri kjósandi, þitt er valið,  það er ekki víst að annað tækifæri komi fyrir okkur, þig og mig.

Hvernig við ætlum að berjast við vandamál framtíðarinnar-XF.IS

Sveitastjórnarkosningar verða 29 maí en þær verða ákveðinn prófsteinn fyrir þjóðina. Vaxandi vantrú gætir hjá almenningi til stjórnmála og er það í raun mjög skiljanlegt. Við verðum þó að velja okkur fulltrúa og núna þurfum við að vanda valið.

Frjálslyndi flokkurinn hefur ekki gengið fyrir mútum eins og ráðandi stjórnmálaöfl. Frjálslyndir eru ekki nefndir á nafn í rannsóknarskýrslu Alþingis í tengslum við eitthvað misjafnt atferli. Bókhald flokksins hefur frá upphafi verið opið.

Mikil endurnýjun hefur átt sér stað í flokknum, ný forysta valin og margir nýir félagsmenn bæst í hópinn. Við komum því til leiks með hreinan skjöld.

Alþjóðagjaldeyrissjóðurinn hefur mælt með kröftugum niðurskurði sem lendir oftast á velferðarmálum. Frjálslyndi flokkurinn hafnar þessari leið og ætlar að verja velferðina.

Með vaxandi fátækt er hætta á því að sum börn eigi þess ekki kost að njóta máltíða með skólasystkinum sínum. Þess vegna vill Frjálslyndi flokkurinn innleiða gjaldfrjálsar skólamáltíðir.

Reynslan hefur kennt okkur að borgararnir þurfa meiri völd, ekki bara á fjögurra ára fresti. Því teljum við að 10% kosningabærra mann geti farið fram á kosningu um mikilvæg málefni. Salan á HS orku er eitt slíkt dæmi. Auk þess teljum við að gagnsæi þurfi að vera algjört þegar fulltrúar okkar sýsla með fjármuni almennings. Það þarf að vera auðvelt að rekja öll útgjöld og hver ber ábyrgð á þeim.

Reykjavíkurborg verður að auka mannaflsfrekar framkvæmdir til að hemja atvinnuleysið. Sjávarútveg og iðnað þarf að efla og samtímis að skapa aukin verðmæti með þekkingu og nýsköpun. Orkuveita Reykjavíkur er því miður mjög skuldug og leita verður allra leiða að halda OR í eigu Reykvíkinga. Frjálslyndi flokkurinn telur mjög brýnt að óháð rannsóknarnefnd rannsaki sveitarstjórnarstigið.

Íbúalýðræði eða Loðvík 14

Konungar fyrr á tímum töldu sig eiga einkarétt á valdinu eins og berlega kemur fram þegar Loðvík 14 sagði "ríkið það er ég". Franska byltingin snéri þessu við þannig að almenningur hefur valdið og deilir því til sinna fulltrúa með kosningum.

Borgabúar hafa stundum reynt, án árangurs, að hafa áhrif á sína kjörnu fulltrúa milli kosninga. Gott dæmi er salan á HS Orku í Borgarstjórn. Þá mættu margir á pallana í Ráðhúsinu og mótmæltu kröftuglega. Þá túlkaði meirihlutinn sjálfan sig á sama hátt og Loðvík 14 gerði um árið.

Þar sem almenningur skilur að það skiptir litlu máli að æpa sig hásan, þá er fólk ekkert að eyða tíma í pólitískt starf eða mótmæli því það kemur svo sem engu til leiðar hvort eð er.

Þessu vill Frjálslyndi flokkurinn breyta. Við teljum að 10% kosningabærra manna eigi að geta fengið kosningar um einstök mál. Þar með er almenningur kominn með völd á milli kosninga og mun það glæða pólitískan áhuga almennings. Þetta mun virka fyrst og fremst sem hemill á valdstéttina við að þröngva einhverjum vafsömum málum í gegn. Þetta er færsla á valdi til okkar, almennings, sem erum ríkið, ekki satt?

Hverjum treystið þið fyrir velferðinni

Grein sem birtist eftir mig í Morgunblaðainu í dag.

 

Það er erfitt að spara þegar maður er góðu vanur en flestir draga úr óþarfa en halda í nauðsynjar þegar að kreppir. Við í Frjálslynda flokknum teljum velferðina vera nauðsyn og ætlum að verja hana.Við verðum að verja börnin okkar og einnig þá sem minna mega sín í þjóðfélaginu. Það er óásættanlegt að börnin okkar borgi fyrir glæpi fjárglæframanna. Á krepputímum verðum við að draga úr allri yfirbyggingu. Þá eigum við við þau stjórnsýslustig sem mega missa sig án þess að grunnþjónustan skaðist. Allur lúxus eins og bílastyrkir, símastyrkir, einkabílstjórar, utanlandsferðir og fleira í þeim dúr sem ekki tengist velferð beint verður að bíða betri tíma.

Skattar á almenning hafa aukist verulega sem gerir einstakligum erfitt fyrir,hvað þá að örfa hagvöxt með neyslu. Frjálslyndi flokkurinn telur þá leið fullreynda.

Frjálslyndi flokkurinn er algjörlega andvígur sölu á auðlindum þjóðarinnar til erlendra aðila og mun gera allt til að Orkuveita Reykjavíkur verði áfram í eigu borgarbúa.  

Frjálslyndi flokkurinn  vill beita sér fyrir því að Reykjavíkirborg kaupi innlendar vörur til að efla íslensk fyrirtæki.

Mjög nauðsynlegt er að skapa fyrirtækjum möguleika á að vaxa og dafna í borginni. Tengja þarf grunnatvinnuvegi eins og sjávarútveg og iðnað við þekkingariðnað til að auka verðmæti. Sprotafyrirtæki atvinnulífsins verða að fá andrými, jafnvel með ívilnunum, ekki dugar að skattleggja hvert annað eða að við sitjum öll í nefndum á vegum hins opinbera. Það verður seint í askana látið.

 

 

Hugmyndir Frjálslyndra að sparnaði hjá Reykjavíkurborg

Frjálslyndi flokkurinn veit að ekki dugar að koma með innantóm kosningaloforð í þeirri kreppu sem Ísland er í dag. Frjálslyndi flokkurinn í Reykjavík hefur mótað sér stefnu af raunsæi, við teljum okkur horfast í augu við staðreyndir lífsins.

Við rekstur Reykjavíkurborgar viljum við forgangsraða þannig að allur lúxus lendir fyrst undir sparnaðarhnífnum. Lúxus er sá hluti rekstrarins sem má missa sig án þess að velferðin í borginni skaðist.

Dæmi um sparnað;

• Seljum Tónlistarhúsið -  því það mun verða mikill baggi á borginni og auk þess soga til sín alla fjármuni sem mögulegt er að tileinka menningu,

• einkabílstjórar,

• bílastyrkir,

• símastyrkir, 

• aðkeyptar skýrslur og skoðanakannanir,

• utanlandsferðir.

• Hægt er að fækka stjórnunarstigum.

• Afnemum veisluhöld.

• Sameinum sveitarfélögin á höfuðborgarsvæðinu.

 

Velferð á ekki að finna fyrir hnífnum fyrr en allur lúxus er horfinn.

Við verðum að opna stjórnsýsluna þannig að borgararnir geti fylgst með í hvað útsvarið þeirra er notað. Það þarf einnig að vera ljóst í öllum tilfellum hver ber ábyrgð á ákvörðunum um útgjöld borgarinnar.

Ég sætti mig ekki við niðurskurð AGS á velferð

Sagan kennir okkur að þegar Alþjóðagjaldeyrissjóðurinn kemur löndum til hjálpar í kreppum versna kjör almennings verulega. AGS gengur út frá því að lánadrottnar fái sitt og að því loknu nær þjóðin hallalausum fjárlögum með niðurskurði. Niðurstaðan er þá sú að sukkararnir í bankakerfinu sleppa og almenningur borgar allan skaðann. Þetta er margendurtekin saga í mörgum löndum og getur hver sem er kynnt sér þá sögu á netinu. Aftur á móti virðist enginn íslenskur blaðamaður hafa kynnt sér þessa sögu í þaula.

Íslenska ríkisstjórnin ætlar greinilega að fylgja fyrirmælum AGS út í ystu æsar. Árni Páll er sendur út af örkinni til að segja landslýð sannleikann fyrir haustið. Nú verður enn meira skorið niður og fólki sagt upp störfum. Fátækt mun aukast enn frekar og sjúkdómar munu stjórna örlögum okkar í ríkara mæli sökum niðurskurðar í velferðarmálum.

Velferðakerfi Reykjavíkurborgar mun ekki fara varhluta af þessari stefnu AGS í boði ríkisstjórnarinnar. Reykjavíkurborg hefur ekki tök á því að fjarlægja meinvaldinn,AGS, og verður því að búa sig undir afleiðingarnar. Því er mjög mikilvægt að almenningur velji sér fulltrúa í borgarstjórn sem skilja samhengið og eru reiðubúnir til að berjast fyrir velferðinni með kjafti og klóm.

Við í Frjálslynda flokknum munum berjast með öllum okkar mætti fyrir viðhaldi velferðarinnar í Reykjavíkurborg.

Velferðarþjónustan skorin niður