Látum frekar þorskinn éta upp fjárlagahallann

Ég vil vekja athygli ykkar á grein sem birtist í Fréttablaðinu í gær þar sem sagt er frá því að allt sé morandi af þorski í Barentshafinu. Þessar niðurstöður vekja athygli þar sem veiðin þar hefur verið langt umfram ráðgjöf Alþjóðahafrannsóknarstofnunarinnar. Geta íslenskir fiskifræðingar ekki lært eitthvað af þessum niðurstöðum? Er ekki betra að veiða þorskinn heldur en að láta hann drepast í sjónum. Jón Kristjánsson fiskifræðingur hefur lengi bent á þá staðreynd að Íslandsmið þoli meiri veiði og þá sérstaklega þorskurinn. Hann hefur haldið því fram að til þess að halda uppi vexti og koma í veg fyrir að þorskurinn éti sjálfan sig út á gaddinn verðum við að veiða meira af honum.

 Nú þurfum við að hugsa allt upp á nýtt og væri því ekki gráupplagt fyrir Hafró að hugsa út fyrir kassann og skoða nýjar hugmyndir sem fram koma. Getur ekki verið að þeir séu að nota röng viðmið eins og margir af okkar ágætu hagfræðingum hafa gert.  Einhvern veginn finnst mér þetta ekki hafa gengið upp hjá þessum spekingum undanfarið. Það hlýtur að vera betra að veiða upp í fjárlagahallann en að skera niður í mennta og heilbrigðismálum og skattpína íslenskan almenning.

Athugasemdir

[joi (IP-tala skráð) 22.9.2009 kl. 23:23]

þessi samanburður á veiðum í Barentshafi og á Íslandsmiðum er fráleitur. Af því veiðin gýs upp þar núna þýðir ekki að ástandið í hafinu kringum ísland hafi eitthvað batnað. Þetta er ekki í fyrsta skipti sem svona lagað gerist í Barentshafinu. Íslendingar nýttu sér þetta fyrir nokkrum árum þegar þeir veiddu í smugunni svokölluðu, vænan þorsk. Hann sást þarna eitt eða tvö sumur, og svo ekki meira.

Það er mikill misskilningur að það sé eins mikill fiskur í sjónum kringum Ísland og menn vilja vera láta. Aðstæður eru kannski aðrar, þ.e.a.s. að færri skip eru að veiðum, sem þýðir að þessir blettir sem mest veiðist á eru til skiptanna. Færri um góðu staðina.

Einnig má geta þess að fiskiskipin í dag s.s. trillurnar eru mun öflugri en fyrir örfáum árum síðan. Þær geta skotist suður á Eldeyjar Boða, þaðan vestur undir jökul og þaðan vestur á firði á einum, tveimur sólarrhingum. Þetta var ekki fært á árum áður. Þá tóku menn sénsa á fiskiríi á ákveðnum stað og svo urðu menn að sætta sig við hvort þar væri fiskur eða ekki. Í dag er auðveldara að elta fiskiríið.

Það er auðvitað ákveðin stefna hjá hagsmunaaðilum að auka kvótann. Það er hópur sem hugsar oft um núið, ekki framtíðina. Þennan hóp þarf að varast. Hann getur unnið þjóðarbúinu mikinn skaða komist hann upp með sínar tillögur.

[Jakobína Ingunn Ólafsdóttir, 22.9.2009 kl. 23:29]

Kannski er þorskurinn í sjónum smjörfjall kvótabraskaranna.

[Jakobína Ingunn Ólafsdóttir, 22.9.2009 kl. 23:32]

Ég velti því stundum fyrir mér hvort hafró eigi kvóta. Það varð alla vega uppi fótur og fit þegar umræða fór af stað um að afhjúp tengsl kvótabraskara.

Kannski er þessi joi hér að ofan kvótabraskari.

[Helga Þórðardóttir, 22.9.2009 kl. 23:33]

Joi ,Finnst þér í alvöru að fiskveiðistefna undangenginna ára hafa gengið upp? Má ekki alveg spyrja spurning og skoða hlutina upp á nýtt. Mér finnst að oft hafi verið þörf en nú sé nauðsyn. Annars þakka ég fyrir innlitið. Mér finnst ákaflega sorglegt hvað svona mikilvægt mál fær litla athygli og skoðun í fjölmiðlum landsins. Ég mátti til með að dreifa athyglinni  og skrifa um eitthvað annað en Davíð Oddson og hugsanlegan ritstjórnarferil hans.

[Helga Þórðardóttir, 22.9.2009 kl. 23:40]

Jakobína, hvað veit maður? Á hverjum degi fær maður fréttir af braski og spillingu. Þjóðin þarf nánast að fá áfallahjál eftir fréttatímana. Við verðum samt að viður kenna vitleysuna svo við getum haldið áfram og komið í veg fyrir að við gerum sömu mistökin aftur.

[Hólmfríður Bjarnadóttir, 23.9.2009 kl. 00:46]

Ég tek fyllilega undir með Helga og tel að tilraunastarfsemi Hafró sé búin að standa það lengi að tími sé kominn til að gera tilraunir á örðum forsendum. Við vitum auðvitað öll að LÍÚ hefur bæði Hafró og ráðherra sjávarútvegsmála í vösum sínum. Peningarnir í sjávarútveginum sem Hannes Hólmsteinn sagði að hefðu verið lífgaðir við eða eitthvað í þá áttina, eru trúlega mikið tilkomnir vegna kvótaskerðinga undanfarinna ára. Þannig hafa kvótaeigendur stundað einskonar innherjaviðskipti til að halda uppi verði á óveiddum fiski. Hann gefur sennilega meira af sér í sjónum í formi veða, leigu á veiðirétti á uppsprengdu verði, en sem afli um borð í skipum þeirra. Ef kvóti væri aukinn verulega við óbreytt kerfi, mundu veðin lækka svo og leiga á kvóta og veiðar yrðu það sem menn neyddust til að stunda að stórum hluta. Það verður að skera upp bæði kvótakerfið sjálft og gera umtalsverðar á rannsóknaraðferðum og reikniforsendum fiskifræðinga

[Steingrímur Helgason, 23.9.2009 kl. 00:58]

Ég held að 'jóinn' þezzi zé dona 'átóróbott' zem að LÍÚ virkjar í hvert zinn zem að einhver zkrifar vitlegar um fizkveiðar en 'móblóið' leyfir.

Hafið er fullt af fizki, ztrandveiðarnar zönnuðu það.

Út frá bryggjunni heima hjá mér, innfirðiz, veiðazt þorzkboltar zem að eiga ekki að vera til, zamkvæmt Hafró.  Þezzir zem að mælduzt ekki í togararallinu 2002-2006.

Þá er líklega eitthvað að bryggjunni heima hjá mér, dona 'Fizgiztovu' ztærðfræðilega.