Kosningaskrifstofa Frjálslynda Flokksins í Glæsibæ.

Í dag tókum við rösklega á því. Málað, þrifið og flutt. Ekki gátum við haft skrifstofuna framsóknargræna heldur skelltum við okkur yfir í hvítt. Það er litur sakleysis. Frjálslyndir hafa ekki verið hluti af því valdi sem hefur keyrt þjóðarbúið þráðbeint á hausinn. Margar hendur unnu vel í dag og dagsverkið gott. Sjálfsagt verður hægt að opna formlega á morgun eða hinn. Samt er allt í lagi að kíkja við.

 

 

 

 

 

 

 

 

 

 

 

 

 

Þarna vinna Sturla og Helga mjög vel saman.

 

 

 

 

 

 

 

 

 

 

 

 

 

 

Þarna nær Guðsmaðurinn nánast til himna.

 

 

 

 

 

 

 

 

 

 

 

 

 

Hérna sést inngangurinn og hver er í Gullna Hliðinu að gæta þess?

 

 

 

 

 

 

 

 

 

 

 

 

 

Nokkuð af húsgögnum er komið og byltingarsófinn að sjálfsögðu mættur.

 

 

 

 

 

 

 

 

 

 

 

 

 

Ekki allt samkvæmt fínustu mode blöðum en dugar samt. Alli velkomnir í kaffi.

Húseigendur í útrýmingarhættu?

Núna er búið að samræma öll úrræði fyrir þá sem geta ekki greitt skuldir sínar af fasteignum. Úrræðin verða þau sömu og hjá Íbúðarlánasjóði. Það rumska smá vangaveltur í þessu samhengi. Ekki sjást nein merki þess að afskrifa eigi skuldir. Það á bara að aðlaga og lengja svo skuldin verði greidd, fyrr eða síðar. Hér er um grófa mismunun að ræða því skuldir hafa verið afskrifaðar hjá mörgum öðrum en venjulegum húseigendum. Þar að auki er tilurð skuldarinnar mjög vafasöm. Verðbólguhækkunin sem við höfum upplifað er ekki vegna meiri neyslu okkar á viðkomandi tímabili. Hækkun íbúðarlána er að miklu leiti orsökuð af röngum ákvörðunum hjá lánastofnunum en ekki lántakenda. Það voru bankarnir sem skuldsettu þjóðina 12 falda þjóðarframleiðslu. Það voru bankarnir sem lánuðu gegn haldlausum veðum. Það voru bankarnir sem tóku stöðu gegn krónunni. Hinum varkára bankamanni var úthýst úr íslenskum fjármálheimi og því hækka lánin okkar.

Því væri mun nær að taka upp samræmdar aðgerðir sem miða að því að lánastofnanir greiði til baka þá fjármuni sem hafðir hafa verið af okkur húseigendum. Að öðrum kosti mun hinn almenni húseigandi deyja út sem fyrirbæri.

Samræmd úrræði vegna greiðsluerfiðleika

Biðreikningur húseigenda.

Frjálslyndi flokkurinn vill reyna að leysa vandamál þeirra sem eru með verðtryggð fasteignalán. Flestir eru því sammála að verðtryggingin  sé böl sem beri að afnema. Menn eru enn þvæla því fyrir sér hver lausnin sé.

Frjálslyndi flokkurinn vill að lánagreiðendur borgi aldrei meira en en 5% verðtryggingu auk vaxta. Þetta gildi frá s.l. áramótum. Það sem útaf stendur fari á sérstakan biðreikning. Síðar þegar um hægist um og ráðrúm gefst til verður biðreikningurinn gerður upp. Þá verður meginreglan sú að menn greiði af honum eftir getu en afgangurinn sennilega afskrifaður. Ávinningurinn er mikill því fólk getur verið áfram í húsunum sínum áhyggjulaust og haldið áfram að ala önn fyrir sér og sínum. Lánastofnanir losna við að eignast fjöldann allan af eignum sem þær eiga í vandræðum með að koma í verð á nauðungaruppboðum.

Það er vel hugsanlegt að þegar tillit er tekið til allra þátta að megnið af biðreikningnum verði afskrifað eða leiðrétt í fyllingu tímans. Hugsunin er sú að sú verðbólga sem geisar núna er ekki raunveruleg, því um gamla verðaukningu er að ræða. Auk þess er verðbólgan sem er að mælast núna tilkomin að hluta til vegna þess að bankarnir tóku stöðu gegn krónunni og juku þar með verðbólguna. Það er ekki sök húseigenda og því ekki réttlátt að þeir beri þær byrðar

Biðreikningurinn gefur okkur ráðrúm til að meta alla þessa þætti. Þeim sem hugnast ekki eða telja sig ekki í þörf fyrir þessa leið geta sagt sig frá henni. Aftur á móti er aðferðin altæk því allir munu vera þátttakendur frá upphafi og sjálfsagt njóta góðs af.

Bónus og kvótagreifarnir.

Þetta er grein sem birtist eftir mig í Fréttablaðinu í dag.

 

Bónus og kvótagreifar.

Það er auðvelt fyrir borgarbarn að skilja óréttlæti kvótakerfisins ef maður gefur sér bara smá tíma. Núna er það lífsspursmál fyrir okkur á mölinni því bankarnir sem áttu að framleiða ómælt úr engu eru farnir. Því verðum við að fara aftur í slorið. Áður fyrr gaf sjávarútvegurinn vel af sér, gull hafsins, menn mokuðu inn gjaldeyri fyrir íslenska þjóð. Núna er öldin önnur. Menn fiska reyndar enn vel. Fyrirtækin eru bara á hausnum, sjávarútvegurinn á Íslandi skuldar morð fjár. Sérkennileg staða hjá iðnaði sem aflar vel og selur sínar afurðir, dæmið ætti að ganga upp ekki satt?

Inn í þessa aldagömlu jöfnu viðskipta, framleiða og selja, var sett smá hjáleið. Kvótakerfið og framsal þess. Svipað og að ég væri kvótagreifi og ætti alla væntanlega viðskiptavini í Bónus. Jóhannes í Bónus yrði að borga mér 5000 kall fyrir hvern viðskiptavin sem verslaði hjá honum. Því yrði Jóhannes að kaupa af mér kvóta af viðskiptavinum. Ef 25 þúsund manns versluðu í Bónus á dag þá þyrfti Jóhannes að borga mér 125 milljónir á dag fyrir kvótann.

 

 

 

Við þessar aðstæður gengur ekki að reka fyrirtæki. Þau safna bara skuldum vegna kvótakaupa. Útgerðarmaðurinn þarf ekki eingöngu að kaupa bát, net, olíu og slíka hluti heldur þarf hann að greiða kvótagreifanum fyrir fá að veiða fiskinn sem við öll eigum. Dæmi eru um að menn hafi greitt allt að fimmtán ára ársveltu, þ.e. að fyrstu fimmtán ár útgerðarinnar fóru í að greiða fyrir kvótann. Eftir situr sjávarútvegurinn með skuldirnar en kvótagreifinn hefur allt sitt á þurru, ástæðan er sú að hann hefur engan kostnað af því að eiga óveiddan fisk.

Í kreppunni kristallast heimska kvótakerfisins. Núna þarf íslensk þjóð tekjur. Aðal mjólkurkúin okkar, sjávarútvegurinn, sem hefði getað bjargað okkur er stórskuldugur. Hvernig á atvinnugrein í slíkri stöðu að skila hagnaði til þjóðarbúsins? Frjálslyndi flokkurinn hefur ætið varað við þessari vitleysu og vill breyta þessu kerfi. Kvótinn á að færast aftur til þjóðarinnar sem getur síðan leigt hann á hógværu verði án möguleika á braski. Það gerir nýliðun mögulega sem er ekki í dag. Ein mesta breytingin er að hjáleiðin, kvótaeigreifar, myndu ekki fá ómælda fjármuni í eigin vasa bara fyrir að hafa umráðarétt yfir óveiddum fiski. Þá er von til þess að sjávarútvegurinn verði aftur sá bjargvættur sem hann áður var.

 

 

 

Réttlátara þjóðfélag

Frjálslyndi flokkurinn styður eindregið að fyrirhuguðu stjórnlagaþingi verði komið á. Grundvallaratriði lýðræðis er einstaklingsfrelsi og möguleikar borgaranna til að hafa áhrif á þjóðfélagið.  Frjálslyndi flokkurinn berst fyrir því að Þjóðaratkvæðagreiðsla um einstök mál skuli fara fram,innan 3 mánaða,krefjist a.m.k. 15%kjósenda þess. Frjálslyndi flokkurinn berst gegn flokksræði og vill auka áhrif Alþingis. Ráðherrar eiga aldrei að gegna þingmennsku. Setja verður skýrar reglur um ábyrgð stjórnmálamanna og viðurlög ef þeir fara gegn augljósum hagsmunum almennings .Við verðum að umbreyta valdakerfinu með það að markmiði að auka gegnsæi og draga úr spillingu

Lásu þeir stefnuskrána okkar?

 Grein sem birtist eftir mig í Morgunbalðinu 27 mars 2009.

 

Reiðin var mikil í vetur og kröfur mótmælenda skýrar. Fyrir utan stjórnarskipti vildi fólk afnám verðtryggingar, kvótann til fólksins og lýðræðisumbætur. Allt mjög kunnuleg baráttumál Frjálslynda flokksins til margra ára.

Í málefnahandbók flokksins fyrir síðustu kosningar er sterklega varað við skuldum fyrirtækja landsins, á þeirri forsendu að ekki sé til innistæða til endurgreiðslu þeirra. Í stefnuskrá flokksins er lögð áheyrsla á valddreifingu og gegnsæi, þ.e. aukið vald til almennings. Því voru þær kröfur sem heyrðust um borg og bí mjög kunnugar kjósendum Frjálslynda flokksins - því þær höfðu fundið sér stað í stefnu flokksins mörg undanfarin ár. Því eru það mikil ósannindi að halda því fram að Frjálslyndi flokkurinn sé eins máls flokkur. Slagorð sem notað er af andstæðingum okkar og er dæmigert fyrir ómálefnalega gagnrýni. Segir í raun meira um þá en okkur.

Afnám verðtryggingar er réttlætismál. Verðtryggingin er hönnuð til að berja niður lántakendur, gerir þá valdalausa og án nokkurrar samningsaðstöðu um lánakjör sín. Fjármagnseigandinn sem lánar hefur allt í hendi sér, samningstaðan er hans. Hann getur ekki tapað vegna verðtryggingarinnar. Auk þess þarf hann ekki að leggja sig neitt fram í sínum rekstri því tap er ekki á dagskrá fyrirtækja sem lána á slíkum kjörum. Þar sem ábyrgð er engin verður óráðssía og spilling. Frásagnir af bruðli og lúxus lánastofnanna Íslands eru glögg dæmi þess. Til að hámarka óskammfeilnina tóku bankarnir að auki stöðu gegn lántakendum við kaup og sölu á gjaldeyri. Frjálslynda flokknum finnst það grafalvarlegar ranghugmyndir, ef valdhafar ætla sér að setja fjármagnseigendur í forgang fram yfir skilvísan almenning. Það væri til að hámarka óréttlætið gagnvart heimilum landsmanna. Frjálslyndi flokkurinn fagnar því að aðrir stjórnmálaflokkar eru að tileinka sér gamla stefnu okkar um afnám verðtryggingar.

 

Animal Farm-allir eru jafnir nema sumir eru jafnari.

Í hruninu í haust fékk maður sterklega á tilfinninguna að Geir og aðrir Sjálfstæðismenn settu flokkshag fram yfir þjóðarhag. Það var aldrei rangt sem þessir Sjálfstæðismenn gerðu og aldrei var hægt að biðja þjóðina afsökunar á einu eða neinu. Menn flugu á Saga klass um heiminn með hroka og sögðu að allt væri í stakasta lagi á skerinu okkar. Grunur minn hefur verið staðfestur. Það er hægt að biðja Sjálfstæðismenn afsökunar en ekki afganginn af þjóðinni.

Mistök gerð við einkavæðingu

Loksins jákvæð frétt frá lánastofnun

Þetta hefðu bankarnir átt að gera fyrir löngu. Sjálfskuldarábyrgðin hefur skapað margan fjölskylduharmleikinn. Þetta gefur von um betra þjóðfélag. Vonandi fylgja aðrar lánastofnanir fordæmi Kaupþings.

Afnema ábyrgð þriðja aðila

Atvinnuleysi

Hugur minn er hjá þeim fjölmörgu sem misst hafa vinnuna undanfarna daga. Það eru efalaust margir  kvíðnir og vita ekki sitt rjúkandi ráð. Ég er jafnframt mjög hugsi yfir því hvernig við sem þjóð tökum á þessum nýja vanda.  Er bara alveg sjálfsagt að segja fólki upp í fjölmiðlum? Getum við afsakað okkur vegna reynsluleysis? Hvernig virkjum við atvinnulausa svo að tengsl þeirra við atvinnulífið rofni ekki. Við verðum að hafa þor til að taka þessa umræðu.

Búsáhaldarbyltingin

Búsáhaldarbyltingin var ákaflega sérstök. Venjulegir Íslendingar stóðu upp úr sófanum og mótmæltu. Grasrót myndaðist. Ég hef tekið þátt í því starfi í vetur. Síðan gerist það að það fjarar undan þessari byltingu. Fólk hvarf aftur til gömlu flokkanna. Einnig stofnuðu vinir mínir nýtt stjórnmálaafl-Borgarahreyfinguna og er það vel. Aftur á móti þurfti ég að kljást við sömu spurningu og margir aðrir, hvert skyldi halda. Þar sem ég hef verið í Frjálslynda flokknum ákvað ég að starfa þar áfram og reyna að styrkja þann flokk. Einnig að koma hugsunum úr grasrótinni og umræðum þar á framfæri þ.e. innan Frjálslynda flokksins. Hugsanlega munu allir flokkar landsins auðgast sökum grasrótarstarfsins í vetur. Spurningin er hvort sá byltingarandi nái inn á þing? Vonandi kjósum við ekki gamla spillingarliðið yfir okkur aftur.